ئەمین عەبدولقادر عومەر

ژیاننامە

امین عبدالقادر عمر ل سالا ١٩٧٧ ل دەڤەرا بەرواری بالا ژدایکبوویە. دووجارا ئاوارەی تورکیا بووینە ل سالا 1978-1982 ل گوندێ زاویتە/منیانش و ل سالا 1988-1992 ل کەمپا مێردینێ. ل گەل دەستپێکرنا خواندنا زانکویێ حەزا ئەدەبیات و نڤیسینێ ل دەف پەیدابوویە. ل دەستپێکێ ب نڤیسینا هۆزانێ دەستپێکرییە و نووکە دیوانەکا هۆزانێ دەستنڤیس هەیە ب ناڤێ (بەژنێن دویکێلی). پاشی چەند کورتە چیرۆکەک نڤیسین و دوو ژ ئەوان ل حەفتیناما پەیمان بەلاڤکرن یا ئێکێ ب ناڤێ (دانوستاندن ل گەل شێتەکی) بوو. دیسان هەر ل قوناغا خواندنا بەکالۆریوسێ حەزا رۆژنامەڤانیێ ل دەف پەیدابوو. ئێکەم جار ل گۆڤارا (دەنگێ قوتابیێن زانکۆ) کارکر. پاشی پشتی تمام کرنا قوناغا بەکالۆریوسێ بۆ پەیامنێرێ حەفتیناما (میدیا) ئەوا ل هەولێرێ دەردچوو. پاشی ل گۆڤارێن (مەتین و پەیڤ) کار کر. هەتا ل سالا 2006 بوویە سەرنڤیسەرێ گۆڤارا (ڤەژەن). ل گەل پیشەیێ رۆژنامەڤانیێ و حەزا ئەدەبیاتان وەک رەخنەگر و ڤەکۆلەرێ ئەدەبێ هژمارەکا زۆرا گۆتارێن رەخنەیی و ڤەکۆلینێن ئەدەبی ل گۆڤار و رۆژنامێن کوردی بەلاڤکرن وەک (پەیڤ، مەتین، رامان، نویبوون، ڤەژەن، هیزل، گۆڤارا زانکۆیا دهۆک، حەفتیناما پەیمان، ئەڤرۆ، وار و حەفتیناما چاڤدێر). دیسان پێنج پەرتووک د بیاڤێن رەخنە و ڤەکۆلینێن ئەدەبیدا بەلاڤکرینە، کو ل ژێرێ دێ ئاماژێ ب هەمیا دەین. وەرگیران ژی ئێک ژ ئەوان بیاڤایە ئەوێن کو نڤیسەری گرنگی پێدای و شارەزایی تێدا پەیداکری وەک تیۆر و پراکتیک. (8) هەشت پەرتووک ژ زمانێن (ئنگلیزی، عەرەبی و فارسی) وەرگیراینە سەر زمانێ کوردی. وەک راهێنەرێ خۆلێن وەرگێرانێیە د ناڤبەرا زمانێن (کوردی و ئنگلیزی و عەرەبی)دا، هەتا نووکە پێنج خۆلێن وەرگێرانێ ل پارێزگەها دهۆکێ د ئاستێن جودادا ڤەکرینە. کارێ وەرگێرانێ بۆ کۆمپانیا و رێکخراوێن بیانی و کوردی دکەت. ل گەل رێکخراوا United for Human Rights وەرگێرێ پرۆژێ کوردیکرنا جارناما جیهانی یا مافێن مرۆڤی بوویە. وەک ماموستا وانەیێن (ئەدەبێ ئنگلیزی) ل بەشێ وەرگیرانێ دبێژیت. بەشداری د چەندین کونفرانسێن زانستیدا کرییە ل زانکۆیێن کوردستانێ و ل زانکۆیێن بریتانی. دیسان بەشداری چەندین فیستەڤال و کۆنفرانسان بوویە ل باکوورێ کوردستانێ. وەک ماموستایێ زانکۆیێ بابەتێن (ئەدەبێ کەڤن، ئەدەبێ نوی، ڤەگێرانناسی، چیرۆک و رۆمان، رێبازێن ڤەکۆلینێ و وەرگێران) گۆتینە. هەروەسا راهێنەرێ پێداگۆجییە ل زانکۆ یا دهۆک، کو بۆ ڤێ مەرەمێ کورسەکێ خواندنێ ل زانکۆ یا HAMK یا فینلەندی خواندییە و باوەرنامە وەرگرتییە.

بڕوانامە

ناڤونیشانێن ئەکادیمی